nuovapoesia.com

1 1 1 1 1
Scritto da Antonio Balia. Pubblicato in Poesie il 10 Dic 2019.
Hot 453 visualizzazioni 0 preferiti

1
Coro male assortadu
chi no as mai paghe in custa vida
finas disamparadu
non bides mancu in ue siat s’essida
e tando irbariadu
ti giogas a sa sola sa partida.
Chene ti vier pessande:
a s’ispessia de tempus chi est colande.
2
Ti nd’essint de trumentos
si pones solu infatu a sa richesa
e in cussos momentos
ateru non ses che pira vachesa
e in chirca de ateros ventos
vene in s’ispricu miras sa bellesa.
E in conca prenu de oro
ma in petorras non tumbat su coro.
3
Ghetande totu impare
ti sicant pensamentos in caminu
e in cussu trigulare
t’alluet banduleri che luminu
e si moes a l’istutare:
ti pesat a ballare su terrinu.
Pro ti torrare in trassu:
detzider deves chi cambies passu.
4
Su male est untziarju
agussadore de cada istrallera
e li ghetat ghespiarju
a cada cosa siat de sa era
che a rundine in ghennargiu
chi non gudit de manc'una manera.
Non solu pessamentos
ma semper prus t’afurrian sos ventos.
5
Si de cussu t’agontzas
seriu t’assicuro ti mantentzo
finas chi mi che pontzas
suta terra o in chelu m’intertentzo
lu pesso e non m’iscontzas
de cantu vene in tira oe ti tentzo.
E ascurta s’allegare
si non connosches picadore a pare.
6
Patinde e gherrande
notes sufrinde in malu modu e dies
su vene irmenticande
che perdes su consolu e non ti vies
e semper prus andande
in malas abbas e non ti nde abbies.
Non ti sias illudende
ca suta terra ti c’est imberghende.
7
No istes dubiosu
ca irballiadu e tortu est cussu achintzu
mancari sias nodosu
t’irboidas comente bidichintzu
e non t’est discassosu
ca in cada pitza venit pistichintzu.
E pro su disacatu:
che soriche che paras cun su gatu.
8
E gai su mandigare
risurtat chene sale e puru fritu
e duncas cussu andare
a bellu a bellu ghetas a imbitu
chene paghe e pasare
e indedda dae cada bonu inditu.
Presu in manos e pedes
tzertu non t’as a moer comente cheres.
9
Cando su male est mudu
prus artu ti ch’intendes de s’artura
non disitzas atzudu
ca mancas siat de pesu e de misura
curtzu e in colore de ludu
ti vies che cucanna in pesadura.
Si su male est s’isposa
a truva ti picat in dontzi cosa.
10
Catzadi a un’ala
cussa allega frassa e traitora
ascurta e pica a pala
non prangas in dolore dontzi ora
imbola s’abba mala
e torra a domo ti preco in bon’ora.
De su male e su vene
su primu imbola e sigundu mantene.
11
Chircande s’afungada
su maleditu diavulu frassu
si mostrat che s’amada
ma li torrat a s’omine fracassu
dandeli sa pessada
comente andande siat a discassu.
E gai chene cherbeddu:
che paras dae ti bidere unu isteddu.
12
Cussu malu pessare
a frimu semper mirat a sa mente
ti preco de abistare
ca podes morrer finas de repente
custa est sa veridade
de chie su male bolet dae sa tzente.
Si cambias guturinu
astringher ti si podet su terrinu.
13
T’at a parrer issena
ma si non daes banda de su totu
no li pesas carena
ca modde t’as a bider che recotu
e iscuru in luna prena
ti bolet pro di poder vider cotu.
E gai in cussa parada
t’abitzas cantu contat sa tzirada.
14
Cando tzertos disitzos
chi die e note vortant a sa gherra
suni malos proitzos
chi modu no ant in chelu e ne in terra
ca solu moent bullitzos
e che podes finas lassare perra.
Ma si ascurtant sos duros
sas tancas si c’isorbent dae sos muros.
15
E a boghe arta naro
chene mancu m’intender prus sa boghe
e a nissunu isparo
puru si mi che lassant solu inoghe
e a nudda prus m’imbaro
mancari mi che serrent in sa Oche.
E mai su maleditu
m’at poder uchider prus a fritu.
16
Mi pare tzustu como
a resonare in bonu sentimentu
non botzo bi siat domo
chi siat in dolore e in turmentu
e pro cussu non dromo
ca ti chertzo bider semper cuntentu.
E si nde tenes contu
cambiande t'as a bider de imbrontu.
17
Cando custa elegia
apo imbastidu sighinde cussitzu
in paghe e alligria
semper ponende in fatu a su proitzu
prus de una vorta in bia
bortadu m’ant a su malu disitzu.
E como chi nd’ispico
a mie solu a su collete pico.
18
Non so pride e ne montza
e de m’aere intorrinadu non suventzo
e no intendo vrigonza
ma semper prus ti naro m’intertentzo
e si puru iscutu a frontza
sintzillu a dontzi modu mi mantentzo.
E ascurta s’allegare
si non connosches picadore a pare.
19
Custa istorchitzada
no isco mancu dae ue siat dipesa
e sighinde sa colada
essire podes foras de malesa
e in cussa risurtada
as a cumprender in ue est sa bellesa.
E tando abista vrade
si che podes collire veridade.
20
Ca in grandi diletu
su male si nde ridet proitzande
chi non dormas in letu
e chi non iscas a ue ses andande
e ti gioghet s’apretu
chi mancu prus t’acates meriande.
Ma si li bortas pala
semper l’as a mantenner a un’ala.

 


Antonio Balia

Autore: Antonio Balia

19 87 21

Submit to FacebookSubmit to Google PlusSubmit to TwitterSubmit to LinkedIn
0 Non mi piace0

Guarda tutti gli scritti di Antonio Balia

Accedi o registrati per inviare un commento o partecipare
  • Nessun commento trovato
È più divertente essere un pirata che arruolarsi in marina.(S.Jobs)
  • Nessun messaggio da mostrare.
  • Utenti Online: 0
  • Utenti Offline: 51
  • Ospiti: 1,426
52 Utenti 481 Articoli 477162 Visite agli articoli

Grazie da Nuovapoesia

Le ultima novità di Nuovapoesia sul tuo desktop  Timeline

Le ultima novità di Nuovapoesia sul tuo desktop